უახლოეს მომავალში ხარაგაულის მუნიციპალიტეტის მიერ დაფუძნებული რამდენიმე ააიპ-ის გაერთიანებაა მოსალოდნელი.

ამ პროცესის დასაწყებად ნებართვისთვის მერიამ საკრებულოს მიმართა. ხარაგაულის მუნიციპალიტეტის საკრებულოს თავმჯდომარე მანანა ბარბაქაძე ამბობს, რომ მომართვას, ჯერჯერობით, არ გაცნობია და საკრებულო გადაწყვეტილებას განხილვის შემდგომ მიიღებს.

ხარაგაულის მუნიციპალიტეტის საკრებულოს აპარატის უფროს ლენა კალანდაძის ინფორმაციით მერიის მიმართვის განსახილველად რიგგარეშე ბიუროს უახლოეს დღეებში მოიწვევენ.

ხარაგაულის მუნიციპალიტეტის მერია შემდეგი ააიპ-ების გაერთიანებას გეგმავს:

  • სკოლამდელ დაწესებულებათა გაერთიანება, სამუსიკო სკოლა და მოსწავლე-ახალგაზრდობის სახლი;
  • „ხარაგაულკეთილმოწყობა“ და „ხარაგაულდასუფთავება“;
  • ისტორიული მუზეუმი, ცენტრალური ბიბლიოთეკა, კულტურის ცენტრი, ლიტერატურული თეატრი და ხალხური შემოქმედების სახლი;
  • ხარაგაულის სპორტის განვითარებისა და მართვის მუნიციპალური ცენტრი, საფეხბურთო კლუბი „ჩხერიმელა 2009“ და „ხარაგაულის მუნიციპალიტეტის განვითარებისა და შიდა ტურიზმის ხელშეწყობის ცენტრი“.