ხარაგაულის მუნიციპალიტეტის საკრებულოში, ისევე როგორც სხვა მუნიციპალიტეტების საკრებულოებში, ფრაქციების თავმჯდომარეებს მოადგილეები ეყოლებათ.

ამის შესახებ ცვლილება „ადგილობრივი თვითმმართველობის კოდექსში“ პარლამენტმა 2017 წლის ბოლოს შეიტანა.

შესაბამისად, ცვლილება შედის საკრებულოს რეგლამენტში. დადგენილების პროექტი საკრებულოს ბიუროს 5 იანვრის სხდომაზე კოლეგებს იურიდიული, სამანდატო, საპროცედურო საკითხთა და ეთიკის კომისიის თავმჯდომარე ოთარ ლურსმანაშვილმა წარუდგინა.

საკრებულოს თავმჯდომარის, მანანა ბარბაქაძის ინფორმაციით, „კონსულტაციებს ელოდებიან ფრაქციის თავმჯდომარეთა მოადგილეების ანაზღაურებასთან დაკავშირებით.“

ამჟამად ხარაგაულის მუნიციპალიტეტის საკრებულოში სამი ფრაქცია ფუნქციონირებს – „ქართული ოცნება-დემოკრატიული საქართველო,“ „ქართული ოცნება-მრეწველები“ და „ქართული ოცნება-კონსერვატორები.“ ფრაქციის თავმჯდომარეთა ყოველთვიური ანაზღაურება 1 650 ლარია.