ხარაგაულის მუნიციპალიტეტის საკრებულოს ბიურომ 5 იანვარს რიგგარეშე სხდომა გამართა.

ბიუროს წევრებმა 2018 წლის ბიუჯეტში შესატანი პირველი ცვლილება განიხილეს.

საბიუჯეტო ცვლილება დეპუტატებს მერიის საფინანსო-საბიუჯეტო სამსახურის უფროსმა ვლადიმერ გელაშვილმა წარუდგინა.

ხარაგაულის მუნიციპალიტეტმა ცენტრალური ბიუჯეტიდან 1 650 000 ლარი ოქტომბერში სტიქიისგან მიყენებული ზიანის სალიკვიდაციოდ მიიღო.

ვლადიმერ გელაშვილის ინფორმაციით, ხარაგაულის მერიას 1 847 900 ლარი ჰქონდა მოთხოვნილი. მერიის ინფრასტრუქტურისა და კეთილმოწყობის სამსახურის მიერ მომზადებული დოკუმენტით, ამ თანხით 68 პროექტის რეაბილიტაცია იგეგმებოდა, – ძირითადად გზების, საყრდენი კედლებისა და ხიდ-ბოგირების აღდგენა.

„ცენტრალური ბიუჯეტიდან მოთხოვნილი თანხა სრულად ვერ მივიღეთ, – ამბობს ვლადიმერ გელაშვილი, – ამიტომ მერიას პროექტების კორექტირება მოუწევს. ზოგი პროექტის განხორციელება რეგიონული განვითარების ფონდიდან იგეგმება.“

ბიუროს წევრების წინადადებაა, რომ სტიქიის სალიკვიდაციოდ მიღებული თანხის ტერიტორიულ ერთეულებში განაწილებისას მერიამ საკრებულოს წევრებთან ითანამშრომლოს.

საბიუჯეტო ცვლილებას დეპუტატები 8 იანვარს საკრებულოს სხდომაზე განიხილავენ.