ხარაგაულის მუნიციპალიტეტის საკრებულოს ბიუროს 13 დეკემბრის სხდომაზე დეპუტატმა ინგა მაღრაძემ აღნიშნა, რომ ყველაფერი ინერციით მიდის და ადგილობრივი ხელისუფლება ააიპ-ებს ხარჯების დასაბუთებას და კონკრეტულ პროგრამებს არ სთხოვს.

„იმის ნაცვლად, რომ ტურიზმის განვითარების პროგრამა დავაფინანსოთ, თანხას ვხარჯავთ ააიპ-ის თანამშრომლების ხელფასებზე, რომლებიც არაფერს ქმნიან,“ – ამბობს ინგა მაღრაძე.

მისი ინფორმაციით, 2018 წელს კულტურის ცენტრთან არსებული ანსამბლი „კახორი“ აღარ დაფინანსდება. ინგა მაღრაძე თვლის, რომ ახალგაზრდებს მოტივაცია უნდა შევუნარჩუნოთ.

ხარაგაულის მერიის საფინანსო-საბიუჯეტო სამსახურის უფროსის, ვლადიმერ გელაშვილის განმარტებით, „კახორის“ წევრები სამსახურში არ დადიან და ამიტომ მათზე ხელფასი არ უნდა გაიცეს. „ხელფასი არც იმას უნდა მივცეთ, სამსახურში რომ დადის და არაფერს აკეთებს, – ამბობს ვლადიმერ გელაშვილი, – უარს არ ვამბობთ ანსამბლის დაფინანსებაზე, წარმოადგინონ პროგრამა და ფულს მიიღებენ.“

„ხარაგაულში ახალგაზრდების დამაგრებაზე ვსაუბრობთ და რა გამოდის. პროგრამულ ბიუჯეტზე ზრუნვა რაღა მაინცდამაინც „კახორით“ დავიწყეთ,“ – ამბობს ვარლამ ჭიპაშვილი.

„თქვენი პოზიცია გასაგებია და ჩემი მდგომარეობაც უნდა გაითვალისწინოთ. ჩვენი ბიუჯეტის შემოსავლის ძირითადი წყაროა ფინანსთა სამინისტროდან მიღებული ტრანსფერი, – აღნიშნა ბიუროს სხდომაზე საფინანსო-საბიუჯეტო სამსახურის უფროსმა ვლადიმერ გელაშვილმა და დასძინა, რომ ფულს ვინც იხდის, მუსიკასაც ის უკვეთავს.“

2018 წლის ბიუჯეტის პროექტს დეპუტატები 19 დეკემბრის სხდომაზე განიხილავენ.

ნინო კაპანაძე