ხარაგაულის მუნიციპალიტეტის საკრებულოში კიდევ ორი ფრაქციის შექმნას იურიდიულ საკითხთა კომისიამ მხარი დაუჭირა.

ფრაქცია – „ქართული ოცნება-კონსერვატორების“ შექმნის მოთხოვნით კომისიას დეპუტატებმა გივი თავზარაშვილმა, აკაკი ლურსმანაშვილმა და ზურაბ ხაჩიძემ მიმართეს.

ფრაქცია „ქართული ოცნება-მრეწველების“ შექმნა დეპუტატებს – იუზა კელენჯერიძეს, გივი ხიჯაკაძესა და ბესიკ ტალახაძეს სურთ.

საკრებულოს იურიდიულ საკითხთა კომისიის თავმჯდომარის, ოთარ ლურსმანაშვილის ინფორმაციით, ფრაქციების შესაქმნელად კომისიისთვის წარდგენილი დოკუმენტაცია „ადგილობრივი თვითმმართველობის კოდექსის“ 30-ე მუხლისა და საკრებულოს რეგლამენტის 35-ე მუხლის მოთხოვნებს შეესაბამება.

საკრებულო 19 დეკემბერს დანიშნულ რიგგარეშე სხდომაზე ფრაქციების შექმნის საკითხს ცნობად მიიღებს.

ხარაგაულის მუნიციპალიტეტის საკრებულოში უკვე შექმნილია ფრაქცია „ქართული ოცნება-დემოკრატიული საქართველო“. სულ ხარაგაულის საკრებულოში სამი ფრაქცია იქნება.

ფრაქციის თავმჯდომარეთა ყოველთვიური ანაზღაურება 1 650 ლარია.