აზიის განვითარების ბანკი რიკოთი-ხარაგაულის ალტერნატიული გზის პროექტს 80 მილიონი დოლარით აფინანსებს.

ფინანსთა მინისტრის მოადგილემ, გიორგი კაკაურიძემ, საქართველოს მთავრობასა და აზიის განვითარების ბანკს შორის სასესხო ხელშეკრულება რატიფიცირებისთვის დღეს, 2017 წლის 18 სექტემბერს, პარლამენტში დარგობრივი ეკონომიკის კომიტეტში წარადგინა.

პროექტი 50 კილომეტრი გზის მშენებლობას ითვალისწინებს. აზიის განვითარების ბანკმა საქართველოს 80 მილიონი დოლარის სესხი 22-წლიანი ვადით გამოუყო.

როგორც ფინანსთა მინისტრის მოადგილემ განმარტა, აღნიშნული პროექტი განსხვავდება რიკოთის პროექტისგან, რომელზეც თავის მხრივ უკვე არსებობს წინასწარი შეთანხმება ევროპის საინვესტიციო ბანკთან, აზიის განვითარების ბანკთან, მსოფლიო ბანკთან და იაპონიის მთავრობასთან, რომლებიც რიკოთის პროექტს დააფინანსებენ. პროექტი 4 წლის განმავლობაში უნდა განხორციელდეს და მისი ბიუჯეტი 700-800 მილიონი დოლარია.

„ეს არის რიკოთის ალტერნატიული, შემოვლითი გზა ხარაგაულის მხრიდან, რომელზეც აზიის განვითარების ბანკმა 80 მილიონი დოლარის რესურსი გამოყო. ეს გზა ძალიან მნიშვნელოვანია ერთის მხრივ რიკოთის სამშენებლო სამუშაოების დროს ალტერნატიული გზის არსებობისთვის, ასევე იქ არსებული დასახლებული პუნქტების ეკონომიკური განვითარებისათვის,“ – ამბობს გიორგი კაკაურიძე.

ელენე გოგბერაშვილი
ფოტოზე: დღეს ასე გამოიყურება ჩუმათელეთი-ხარაგაულის საავტომობილო გზა