ხარაგაულის თოჯინების თეატრმა სპექტაკლის – „აბა დამაცადეთ, თაგუნებო!“ პრემიერა გამართა.

ეფენ ჩაპოვეტის პიესა მარტოხელა ქალზე მოგვითხობს, რომელსაც თაგუნები შეეჩვივნენ. ქალბატონმა მათ მოსაგერიებლად ფისო მოიყვანა. ფისო კი თაგუნებს დაუმეგობრდა. დიასახლისზე გაბრაზებულმა მეგობრებმა სახლიდან წასვლა გადაწყვიტეს, თუმცა, ქალბატონი დაბადების დღეს მარტო არ დატოვეს და გაახალისეს.

ირინე ჩხეიძის რეჟისორობით დადგმული სპექტაკლი პატარებს ძალიან მოეწონათ, – ისინი ტაშითა და ოვაციებით ხვდებოდნენ დეიდა მარინეს (ლუიზა კიკნაძე),  თაგუნების – კიწისა და კიკის (მაია ბერაძე, ირინე ჩხეიძე), ფისოს (გიორგი ჭიპაშვილი) სცენაზე გამოჩენას.

სპექტაკლის შემდეგ პატარა მაყურებელმა ბარბარე ხიჯაკაძემ გვითხრა, რომ მას ყველაზე მეტად თაგუნების საქციელი მოეწონა, როცა მათ სათაგურიდან ფისო გამოიხსნეს.

თეატრის რეჟისორის, ირინე ჩხეიძის ინფორმაციით, „აბა დამაცადეთ, თაგუნებო!“ მათი დასის რიგით მეექვსე სპექტაკლია. თოჯინების თეატრი ხარაგაულის კულტურის ცენტრში 2009 წლიდან ფუნქციონირებს.

ხარაგაულის თოჯინების თეატრი სპექტაკლით, „აბა დამაცადეთ, თაგუნებო!“ სექტემბერში ჭიათურაში გამართულ თოჯინების თეატრების ფესტივალში მიიღებს მონაწილეობას.