ხარაგაულის #1 საბავშვო ბაღში სასწავლო-სააღმზრდელო პროცესი 11 აგვისტომდე გრძელდება. ამ ინფორმაციას ხარაგაულის მუნიციპალიტეტის სკოლამდელ დაწესებულებათა გაერთიანების დირექტორი მამუკა ჭიპაშვილი ავრცელებს. მისივე ინფორმაციით, მოიძიეს ერთი ჯგუფის ფუნქციონირებისთვის საჭირო თანხა – 2 700 ლარი.

„ხარაგაულის #1 საბავშვო ბაღის გამგემ ყველა მშობელს მიაწოდა ინფორმაცია, რომ განცხადება დაეწერათ, თუ 20 ივლისიდან 11 აგვისტომდე შვილის საბავშვო ბაღში ტარება სურდათ, – ამბობს მამუკა ჭიპაშვილი, – დღეის მდგომარეობით განცხადებით ოცდაორმა მშობელმა მოგვმართა.“

ხარაგაულის სკოლამდელ დაწესებულებათა გაერთიანებაში შემავალ 14 საბავშვო ბაღში არდადეგები 30 ივნისიდან დაიწყო. აღსაზრდელები დღემდე მხოლოდ ხარაგაულის #1 და #2 საბავშვო ბაღებში დადიან.

სასწავლო პროცესი გაერთიანების ყველა საბავშვო ბაღში 11 სექტემბერს განახლდება.