25 ივნისს, 13:00 საათზე, ხარაგაულის ცენტრალურ ბიბლიოთეკაში გაიმართება კონფერენცია თემაზე: „ნევროლოგიისა და ნეიროფსიქოლოგიის ახალი ჰორიზონტები დასავლეთ საქართველოში“.

ნევროლოგიისა და ნეიროფსიქოლოგიის ინსტიტუტის ხედვას ეპილეფსიის მართვის კუთხით დასავლეთ საქართველოს რეგიონში დამსწრეთ გააცნობს სოფიო კასრაძე (ას. პროფ. ნევროლოგი, ეპილეპტოლოგი. ნნი-ს სამეცნიერო ხელმძღვანელი, ეპილეფსიის სახელმწიფო პროგრამის დირექტორი, ეპილეფსიასთან ბრძოლის საერთაშორისო ლიგის საქართველოს განყოფილების გენერალური მდივანი).

ნეიროფსიქოლოგიური მიმართულების პერსპექტივებზე დასავლეთ საქართველოში ისაუბრებს თამარ გაგოშიძე (სრული პროფესორი, ივ. ჯავახიშვილის თსუ-ს ფსიქოლოგიის ფაკულტეტის დეკანი, ნნი-ს ნეიროფსიქოლოგიური სამსახურის ხელმძღვანელი, ფსიქომეტრული და საკონსულტაციო ასოციაციის პრეზიდენტი).

ნევროლოგიისა და ნეიროფსიქოლოგიის ინსტიტუტის ხედვა ნევროლოგიური პათოლოგიების მართვის საკითხებში – მომხსენებელი გიორგი ლომიძე (მედიცინის დოქტორი, ნევროლოგი, ნევროლოგიისა და ნეიროფსიქოლოგიის ინსტიტუტის კლინიკური დირექტორი).

კონფერენციის ფორმატი გათვლილია სამედიცინო თუ ჯანდაცვის სფეროში მოღვაწე პირებისთვის, ფსიქოლოგების, საგანმანათლებლო სისტემის წარმომადგენლებისთვის და სხვა დაინტერესებული პირებისთვის.

კონფერენცია მიზნად ისახავს საზოგადოებისთვის აქტუალური და პრობლემური საკითხების განხილვას. ასევე დამსწრე საზოგადოება მიიღებს ინფორმაციას იმ  სახელმწიფო პროგრამების შესახებ, რომელიც ინსტიტუტის ბაზაზე ხორციელდება:

  1. „ეპილეფსიის პრევენციისა და ადრეული დიაგნოსტიკის პროგრამა“;
  2. ერთიდან ექვს წლამდე ასაკის ბავშვთა განვითარების დარღვევების პრევენციისა და ადრეული დიაგნოსტიკის ქვეპროგრამა“;

კონფერენცია ორგანიზებულია ხარაგაულის მუნიციპალიტეტის გამგეობის, ა/ო „ნაბიჯი ხარაგაულისა“ და „ნევროლოგიისა და ნეიროფსიქოლოგიის ინსტიტუტის რეგიონული ცენტრის“ მხარდაჭერით.

დასწრება თავისუფალია!