„თეატრალური იმერეთი 2017“ 27 მაისს ქუთაისის ლადო მესხიშვილის სახელობის სახელმწიფო, პროფესიულ თეატრში გაიხსნება.

წელს ფესტივალში სულ მონაწილეობას მიიღებს 14 სახელმწიფო პროფესიული და სახალხო თეატრი.

ხარაგაულის ოთარ აბაშიძის სახელობის სახალხო თეატრი (რეჟისორი ირინე ჩხეიძე) იმერეთის ფესტივალზე 12 ივნისს სპექტაკლით „ექვსი შინაბერა და ერთი მამაკაცი“ წარსდგება.

„თეატრალური იმერეთი 2017“–ის ჟიური წევრები არიან: თეატრმცოდნე, ხელოვნებათმცოდნეობის დოქტორი, თეატრის კრიტიკოსთა საერთაშორისო ასოციაციის გენერალური მდივანი მაკა ვასაძე (თავმჯდომარე); ხელოვნებათმცოდნე, საქართველოს შოთა რუსთაველის თეატრისა და კინოს სახელმწიფო უნივერსიტეტის პროფესორი, ხელოვნებათმცოდნეობის დოქტორი ლელა ოჩიაური, საქართველოს თეატრის კრიტიკოსთა კავშირის პრეზიდენტი, თეატრმცოდნე და ცნობილი ტელეწამყვანი  ნიკოლოზ წულუკიძე. ჟიურის შემადგენლობაში ასევე იმუშავებს დავით გორდელაძე იმერეთის სამხარეო ადმინისტრაციიდან. წლევანდელ ფესტივალს ეყოლება ახალგაზრდული ჟიური, რომელიც პარალელურად შეაფასებს ფესტივალზე წარმოდგენილ სპექტაკლებს.

სპექტაკლის „ექვსი შინაბერა და ერთი მამაკაცი“ პრემიერა ხარაგაულის კინოთეატრში 5 და 9 ივნისს შედგება.