ცესკოს ახალი პროექტის „ვესაუბრები ამომრჩეველს“ ფარგლებში, საქართველოს ყველა რეგიონში, 24 აპრილიდან 31 მაისის ჩათვლით, ამომრჩევლებთან შეხვედრები გაიმართება.

ხარაგაულის საოლქო საარჩევნო კომისიის თავმჯდომარის, გია ცისკაძის, ინფორმაციით, საოლქო კომისიის წარმომადგენლები ხარაგაულელ ამომრჩევლებს შემდეგი გრაფიკით შეხვდებიან: 8 მაისს შეხვედრა დაბა ხარაგაულში გაიმართება; 10 მაისს – ბორითში; 11 მაისს – კიცხში; 15 მაისს – მოლითში.

„შეხვედრებზე მოსახლეობას დაურიგდება ფლაერები, რომლებშიც ამომრჩევლები საკუთარ აზრს დააფიქსირებენ. ფლაერებს ერთად შევკრებთ და გადავუგზავნით ცენტრალურ საარჩევნო კომისიას. ცესკო მაქსიმალურად შეეცდება მოსახლეობის მოსაზრებების გათვალისწინებას 2017 წლის ადგილობრივი თვითმმართველობის არჩევნებისათვის, – ამბობს გია ცისკაძე.

საქართველოს ცენტრალური საარჩევნო კომისიის თავმჯდომარის, თამარ ჟვანიას, განმარტებით პროექტი „ვესაუბრები ამომრჩეველს“ არჩევნებთან დაკავშირებით ამომრჩეველთა ცნობიერების ამაღლებას გულისხმობს და საოლქო საარჩევნო კომისიებსა და ამომრჩევლებს შორის უფრო მჭიდრო კომუნიკაციის ჩამოყალიბებას ემსახურება.

პროექტი „ვესაუბრები ამომრჩეველს“ საარჩევნო სისტემების საერთაშორისო ფონდის (IFES) მხარდაჭერით ხორციელდება.

თამთა გოგოლაძე