ხარაგაულის საგანმანათლებლო რესურსცენტრის უფროსის, დავით კიკნაძის, ინფორმაციით, განათლებისა და მეცნიერების სამინისტროს ინფრასტრუქტურული სააგენტო უახლოეს მომავალში ღარიხევის, ბორისა და ზვარეს სკოლების სარემონტო სამუშაოების შესასყიდად ელექტრონულ ტენდერს გამოაცხადებს.

„სატენდერო დოკუმენტაცია უკვე მზადაა. იგეგმება ღარიხევის დაწყებითი სკოლის მთლიანი კაპიტალური რემონტი, რაზეც დაახლოებით 75 000 ლარი დაიხარჯება. აღსანიშნავია, რომ სკოლა 108 წლისაა. 190 000 ლარი დასჭირდება ბორის საჯარო სკოლის შენობის სარემონტო სამუშაოებს.

სასიხარულოა, რომ ზვარეს საჯარო სკოლა რემონტდება, რისთვისაც დაახლოებით 275 000 ლარია გათვალისწინებული. სახურავი და კარ-ფანჯარა შეიცვლება, ცენტრალური გათბობის სისტემა დამონტაჟდება და შესასვლელი კიბე გარემონტდება,“ – ამბობს დავით კიკნაძე.

მისივე ინფორმაციით, ბორითის საჯარო სკოლაში სპეციალური საჭიროების მქონე მოსწავლეების გადაადგილებისათვის პანდუსი მოეწყობა.