ინფექციონისტი მაია ბუწაშვილი, დიუშენის სინდრომის მქონე ბავშვებისთვის მედიკამენტის მიწოდებასთან დაკავშირებით, სოციალურ ქსელში მოსაზრებას აქვეყნებს:

„დიუშენის სინდრომის მქონე ბავშვებთან დაკავშირებით სამინისტროს პოზიცია უფრო გასაგები იქნებოდა, რომ გამოდიოდნენ და ამბობდნენ – პრეპარატი ძალიან ძვირია და საქართველოსნაირ გაჭირვებულ ქვეყანას მისი მოქალაქე ბავშვებისთვის ყიდვის შესაძლებლობა არა აქვს. მაგრამ ამას როგორ იტყვიან, როცა ყველას ერთი და იგივე კითხვა გაუჩნდება – აბა ეს გაჭირვებული ქვეყანა ბიუჯეტის ამდენ ვირთხას როგორ უძლებს და ამდენი უაზრო ხარჯისთვის ფული საიდან ჩნდება?

ჰოდა, ამიტომ ვითომ უფრო ჭკვიანური (ჩემი აზრით, ვირეშმაკური) გამოსავალი იპოვეს და თითქოსდა ბავშვების უსაფრთხოებაზე დარდობენ, თორემ ისე ამ წამლის ყიდვა რა პრობლემა იქნებოდა.

ვითომ დედამინაზე არსებობდეს წამალი გვერდითი მოვლენების გარეშე და ვითომ იმ ჩვენზე ბევრად განვითარებულ ქვეყნებში, სადაც ამ მედიკამენტებს იყენებენ, ბავშვების უსაფრთხოება არავის ადარდებს და ჯინაზე უკეთებენ საშიშ წამლებს.

გარდა ამისა, სახელმწიფოს იმის შიშიც აქვს, რომ თუ ქუჩაში გამოსულ მშობლებს (სამართლიანი მოთხოვნებით) ამ „პრეტენზიას“ დაუკმაყოფილებენ, სხვა დიაგნოზების მქონე ადამიანებიც „გათავხედდებიან“ და ისინიც მოითხოვენ წამლებს. მართლაც რა თავხედობაა სახელმწიფოს მოსთხოვო მკურნალობა, როცა ბიუჯეტის ფულით კარტიეს სამაჯურები და ოქროს ზოდები აქვთ ვიღაცებს საყიდელი.

სახელმწიფო მაშინ არის შემდგარი (და ჩვენ ყოველდღე გვიცხადებენ იმედის ქარდებით, რომ მთელი რიგი მაჩვენებლებით ვლიდერობთ მსოფლიოში ქვეყნების სიებში), როცა თავის მოქალაქეების ჯანმრთელობის უფლებას იცავს. ამაზე მარტივი რა არის?“ – წერს სოციალურ ქსელში ექიმი ინფექციონისტი მაია ბუწაშვილი.