ხარაგაულის მაჟორიტარი დეპუტატი პარლამენტში, პარლამენტის საფინანსო-საბიუჯეტო კომიტეტის თავმჯდომარის პირველი მოადგილე ნოდარ ებანოიძე 14-დან 20 ივნისამდე სამუშაო ვიზიტით აშშ-ში იმყოფება.

საქართველოს პარლამენტის დელეგაცია აშშ-ში საპარლამენტო საფინანსო ზედამხედველობის სფეროში გამოცდილების გაზიარებისა და სამომავლო ურთიერთთანამშრომლობის შეთანხმების მიზნით გაემგზავრა.

ნოდარ ებანოიძესთან ერთად აშშ-ში იმყოფებიან პარლამენტის საბიუჯეტო ოფისის უფროსის მოვალეობის შემსრულებელი თათია ხეთაგური და GIZ-ის პროგრამის მრჩეველი საჯარო ფინანსების მართვის საკითხებში ინგა სინჯიკაშვილი.

დელეგაცია ეწვევა ამერიკის შეერთებული შტატების კონგრესს და კონგრესის საბიუჯეტო ოფისს. ვიზიტის ფარგლებში კონგრესის წარმომადგენელთა პალატის საბიუჯეტო კომიტეტის წევრებთან, კონგრესმენებთან გაიმართება შეხვედრები თემაზე: მთავრობის საქმიანობის კონტროლი, თანამშრომლობა კონგრესის საბიუჯეტო ოფისთან და ამერიკის უმაღლეს აუდიტორულ ორგანოსთან.

ვიზიტი გერმანიის საერთაშორისო თანამშრომლობის საზოგადოების პროგრამის (GIZ) „საჯარო ფინანსების მართვა სამხრეთ კავკასიაში“ ხელშეწყობით ხორციელდება.