საქართველოს საჯარო სკოლებში დღეს, 17 ივნისს, სკოლის თვითმმართველობის უმაღლესი ორგანოს –  სამეურვეო საბჭოს არჩევნები ტარდება.

ხარაგაულის საგანმანათლებლო რესურსცენტრის უფროსის, მარინე ვეფხვაძის, ინფორმაციით, ხარაგაულის ყველა საჯარო სკოლაში თვითთმართველობის არჩევნები მშვიდ ვითარებაში მიმდინარეობს.

„არჩევნებში პედაგოგთა მონაწილეობის 100%-იანი მაჩვენებელია, აქტიურობენ მშობლები“,- ამბობს მარინე ვეფხვაძე.

საშუალო საფეხურის სკოლის სამეურვეო საბჭო არანაკლებ 7 წევრისაგან შედგება, ხოლო საბაზო საფეხურის სკოლის – არანაკლებ 8 წევრისა.

სამეურვეო საბჭოს შემადგენლობაში შედიან მასწავლებლები, მოსწავლეთა მშობლები და საშუალო საფეხურის მოსწავლეთა თვითმმართველობის მიერ არჩეული წარმომადგენელი. სამეურვეო საბჭოში მასწავლებლებისა და მოსწავლეთა მშობლების არჩევა 3 წლის ვადით ხდება. საარჩევნო პროცესი სკოლებში 16:00 საათზე დასრულდება. არჩევნების შედეგები დღის ბოლომდე გახდება ცნობილი.

სამეურვეო საბჭოს წევრობის კანდიდატთა რეგისტრაცია 5 ივნისიდან 11 ივნისის ჩათვლით მიმდინარეობდა.

სამეურვეო საბჭოს პირველი არჩევნები სკოლებში 2006 წელს ჩატარდა.