ხარაგაულელებს საახალწლო განწყობის შექმნა კულტურის სამსახურისა და კულტურულ-საგანმანათლებლო დაწესებულებებისგან შემოთავაზებული ღონისძიებებით შეეძლებათ.

ხარაგაულის გამგეობის კულტურის სამსახურის უფროს ირინე ჩხეიძის ინფორმაციით, 23-29 დეკემბერს ხარაგაულის კინოთეატრში 14:00 საათზე გაიმართება საახალწლო ფილმების ჩვენება.

17 დეკემბრიდან დაიწყო და 25 დეკემბრამდე გაგრძელდება საახალწლო ღონისძიებები ეთერ კიკნაძის სახელობის ხარაგაულის სკოლამდელი აღზრდის დაწესებულებათა გაერთიანებაში. მუნიციპალიტეტის საბავშვო ბაღებში ზეიმები 12:00 საათზე იწყება.

15-29 დეკემბერს ხარაგაულის მუნიციპალიტეტის საბავშვო ბაღების აღსაზრდელები ნახავენ თოჯინების თეატრს „მაშა და დათვი“.

22 დეკემბერს, 13:00 საათზე, ხარაგაულის ისტორიულ მუზეუმში პროექტის „ჩვენი პატარა ხელებით“ ფარგლებში წარმოადგენენ საახალწლო აქსესუარებს.

შოთა ბუაჩიძის სახელობის ხარაგაულის სამუსიკო სკოლაში საახალწლო კლასიკური მუსიკის საღამო 25 დეკემბერს, 15:00 საათზე, გაიმართება.

ხარაგაულის მოსწავლე-ახალგაზრდობის სახლი კინოთეატრის შენობაში „საახალწლო კარნავალს“ 29 დეკემბერს, 15:00 საათზე, შემოგვთავაზებს.

28 დეკემბერს ასევე კინოთეატრის შენობაში, 15:00 საათზე გაიმართება საახალწლო კონცერტი.

30 დეკემბერს საახალწლო კარნავალს მუნიციპალიტეტის საჯარო სკოლების მოსწავლეები წარმოგვიდგენენ კინოთეატრის შენობაში, 15:00 საათზე.

ხარაგაულში უკვე გაიმართა ფოლკლორული ანსამბლის „იბერი“ კონცერტი. კულტურის ცენტრთან არსებული თოჯინების თეატრმა კი სპექტაკლი წარუდგინა ზვარელ ბავშვებს.

თინათინ გელაშვილი
ჟურნალისტთა სკოლა „იმედი ხვალის“ სტუდენტი