თავისუფალი უნივერსიტეტის სტუდენტი ნია ფოფხაძე 3-დან 28 აგვისტოს ჩათვლით, როგორც გერმანიის აკადემიური გაცვლის სამსახურის DAAD-ის სტიპენდიანტი, ქალაქ ბონში, გოეთეს ინსტიტუტში, სრული დაფინანსებით, გერმანული ენის კურსს (B2 დონე) გაივლის.

ნია ფოფხაძე თავისუფალ უნივერსიტეტში საერთაშორისო ურთიერთობების ფაკულტეტზე სწავლობს.

„DAAD-ის სტიპენდიის მოსაპოვებლად გერმანული ენის ცოდნის განმსაზღვრელი ტესტი გავიარე და B1 დონის სერთიფიკატი ავიღე, – ამბობს ნია, – აპლიკაცია გადავაგზავნე, სადაც უნივერსიტეტის ნიშნების ფურცელთან ერთად,  X-XII კლასების ნიშნებსაც ითხოვდნენ.

ასევე ავტვირთე CV და  სამოტივაციო წერილი, რომელშიც დავასაბუთე, თუ რატომ დავინტერესდი გერმანული ენითა და კულტურით. სრული დაფინანსების შესახებ დასტური 4 თვეში მომივიდა, ეს ძალიან დიდი სიხარული იყო. იმედი მაქვს, ჩემს სამომავლო საქმიანობაში გერმანიაში მიღებული გამოცდილება ძალიან დამეხმარება“.

ნია ფოფხაძე, გერმანიაში გამგზავრებამდე, 23-27 ივლისს, აკაკი ბაქრაძის საზოგადოების მიერ დაორგანიზებულ ტაო-კლარჯეთის ექსპედიციაში ჩაერთვება. ამ ექსპედიციის შესახებ ნიამ უნივერსიტეტში შეიტყო და გასაუბრება წარმატებით დაძლია.

„40 წუთიანი ინტერვიუს ეტაპის გადალახვის შემდეგ, რამდენიმე დღეში დამიკავშირდნენ და მითხრეს, რომ 14 მონაწილესთან ერთად ამირჩიეს, – ამბობს ნია, – ყოველთვის მსურდა ტაო-კლარჯეთის ქართული ისტორიული ძეგლების მონახულება და მათი შესწავლა. ეს ექსპედიცია მნიშვნელოვანია ტაო-კლარჯეთში არსებული ქართული ძეგლების დღევანდელი მდგომარეობის აღწერისა და სამეცნიერო კვლევებისთვის“.

წარმატებებს ვუსურვებთ ნია ფოფხაძეს.

ფოტოზე: ნია ფოფხაძე გერმანიის ელჩ პიტერ ფიშერთან და DAAD-ის რეგიონული ოფისის ხელმძღვანელ სილვია შმიდთან ერთად