ხარაგაულის მუნიციპალიტეტი, მულტიფუნქციური (ახალგაზრდული, კულტურული, ტურისტული, საგანმანათლებლო) ცენტრისთვის განკუთვნილი შენობის სარეაბილიტაციოდ საპროექტო-სახარჯთაღრიცხვო დოკუმენტაციის შესყიდვას აპირებს.

„საპროექტო ობიექტი წარმოადგენს 3 სართულიან შენობას ვიტრაჟებით, რომელიც არის ძლიერ დაზიანებული, აღსადგენია შენობის მდგრადობა, ფასადი, შიდა და გარე კიბეები, სახურავი, ასევე საჭიროა შიდა სივრცის რეაბილიტაცია“, – აღნიშნულია სატენდერო დოკუმენტაციაში.

ამავე დოკუმენტაციით ირკვევა, რომ ამ სამსართულიანი შენობის აღდგენას, სავარაუდოდ, 700 ათასი ლარი დასჭირდება.

კონკრეტულად რომელ შენობაზეა საუბარი, სად აპირებს ადგილობრივი ხელისუფლება მულტიფუნქციური ცენტრის მოწყობას, – ამ შეკითხვით ხარაგაულის მერის მოადგილეს, სატენდერო კომისიის თავმჯდომარეს, დავით დევდარიანს მივმართეთ.

დავით დევდარიანმა დაგვიდასტურა, რომ საუბარია სავაჭრო ცენტრ „უნივერმაღზე“.

ტენდერში გამარჯვებულმა საპროექტო ორგანიზაციამ შპს „არქიტრავი – XXI“ სარეაბილიტაციო შენობის საპროექტო დოკუმენტაციის მომზადება 27 745 ლარად ივალდებულა. ხარაგაულის მუნიციპალიტეტს ტენდერი 56 ათას ლარზე ჰქონდა გამოცხადებული.

საპროექტო-სახარჯთაღრიცხვო დოკუმენტაცია, ხელშეკრულების გაფორმებიდან 35 კალენდარული დღის განმავლობაში უნდა მომზადდეს.