ხარაგაულში კანალიზაციის სისტემის მშენებლობის გამო, გუშინ გვიან საღამოს, დევების ქანდაკების მიმდებარე ტერიტორიაზე, სამშენებლო კომპანიამ ბუნებრივი აირის ცენტრალური მილსადენი დააზიანა.

„სოკარ ჯორჯია გაზის“ ზესტაფონის ფილიალის მენეჯერის, ლევან აბაშიძის, ინფორმაციით, დაზიანება გუშინვე აღმოიფხვრა. თუმცა, უსაფრთხოების მიზნით, ბუნებრივი აირის მოწოდება დღეს დილიდან დაიწყეს.

„დაბა ხარაგაულში მომხმარებლებისთვის ბუნებრივი აირის ჩართვა უკვე დავიწყეთ. გაზის მოწოდება 12 საათისთვის სრულად აღდგება,“ – ამბობს ლევან აბაშიძე.

კომპანია მომხმარებლებს მოუწოდებს, გამოიჩინონ სიფრთხილე, გაზის დანადგარები და ონკანები ჩაკეტილ მდგომარეობაში იქონიონ.