29 ივლისს, საღამოს 19 საათზე, ზვარეში ახალგაზრდული ბანაკის წლევანდელი სეზონი გაიხსნება.

ხარაგაულის მუნიციპალიტეტის განვითარებისა და შიდა ტურიზმის ხელშეწყობის ცენტრის დირექტორის, ბერიკა თურმანიძის, ინფორმაციით, ზვარეს კარვების ბანაკი მშვიდობის კორპუსის 8 ამერიკელ მოხალისესა და საქართველოს სხვადასხვა რეგიონში მცხოვრებ 47 ქართველ ახალგაზრდას უმასპინძლებს.

„მშვიდობის კორპუსის მოხალისეებმა ბანაკის პროგრამა თავად დაგეგმეს, – ამბობს ბერიკა თურმანიძე, – დაგეგმილი აქტივობები, ძირითადად, ახალგაზრდებში ცხოვრების ჯანსაღი წესის დამკვიდრებას ემსახურება. დაგეგმილია სხვა ღონისძიებებიც.“

მშვიდობის კორპუსმა ზვარეს კარვების ბანაკის ორგანიზება ხარაგაულის ტურიზმის სამსახურისგან შეისყიდა.

„ამ თანხით (6 700 ლარი) ბანაკის ტერიტორია მოწესრიგდა, – ამბობს ბერიკა თურმანიძე, – მოეწყო სველი წერტილები, სამზარეულო, საჭირო ინვენტარი, ახალი კარვები და საკვები შევიძინეთ.“

ახალგაზრდული ბანაკის პირველი ნაკადის მონაწილეები ზვარეში რვა დღეს დაისვენებენ.

ზვარეს ახალგაზრდული ბანაკი 5 აგვისტოდან 15 აგვისტოს ჩათვლით 200 ხარაგაულელ ახალგაზრდას სამ ნაკადად მიიღებს.