ხარაგაულის მუნიციპალიტეტში საატესტატო გამოცდებზე  დარეგისტრირებული 235 კურსდამთავრებულიდან 24 – მა მინიმალური ზღვარი ვერ გადალახა.

საგანმანათლებლო რესურსცენტრის უფროს დავით კიკნაძის ინფორმაციით, ყველაზე ცუდი შედეგები მათემატიკასა და უცხო ენაში დაფიქსირდა. მისივე თქმით, მოსწავლეები გამოცდებისთვის სათანადოდ არ მოემზადნენ.

მარელისის საჯარო სკოლის დირექტორი ვერა ოდიკაძე თვლის, რომ მოსწავლეების მომზადების დონე არ არის შესაბამისი, რის გამოც პასუხისმგებლობა სკოლას, მასწავლებელსა და მშობელს თანაბრად ეკისრება.

მოლითის საჯარო სკოლაში წელს საატესტატო გამოცდები ყველა კურსდამთავრებულმა ჩააბარა. თუმცა სკოლის დირექტორი როლანდი ცუცქირიძე ამბობს, რომ შედეგების გაანალიზება უკეთესის მისაღწევად აუცილებელია.

კურსდამთავრებულები, რომლებიც საატესტატო გამოცდებზე ჩაიჭრნენ, უმაღლეს სასწავლებლებში ერთიან ეროვნულ გამოცდებზე არ დაიშვებიან.