მედიის განვითარების ფონდი (MDF) ახალი ინიციატივით გამოდის. ინიციატივის მიზანია ნაციზმზე გამარჯვების დღე საქართველოში, ევროპის ქვეყნებთან ერთად, 8 მაისს აღინიშნოს. ასევე აამაღლოს ცნობიერება იმის შესახებ, თუ როგორ იყენებს კრემლი მეორე მსოფლიო ომის ხსოვნასა და სიმბოლიზმს, მათ შორის „უკვდავ პოლკს“ და წმინდა გიორგის ლენტს, პოლიტიკურ ინსტრუმენტად.

საინფორმაციო კამპანიის მიზანია საქართველოს მოქალაქეებს მოუწოდოს გამარჯვების დღე 8 მაისს, ჰეშთეგით #ევროპასთანერთად აღნიშნონ, ასევე მოუწოდებს, რომ გააზიარონ MDF-ის მიერ მომზადებული მოკლემეტრაჟიანი დოკუმენტური ფილმი, რომელიც  კრემლის მიერ დაფინანსებული „უკვდავი პოლკის“ კამპანიაზეა ფოკუსირებული.

„მილიონობით ადამიანმა საბჭოთა რესპუბლიკებიდან, ევროპიდან და ამერიკიდან თავისი სიცოცხლე მეორე მსოფლიო ომში თავისუფლებისთვის ბრძოლას შესწირა, – ამბობს MDF-ის აღმასრულებელი დირექტორი თამარ კინწურაშვილი, – ჩვენ პატივი უნდა მივაგოთ მათ თავგანწირვას და უფლება არ მივცეთ კრემლს, მათი ხსოვნა საკუთარი ამჟამინდელი აგრესიული საგარეო პოლიტიკის ინსტრუმენტად გამოიყენოს. ჩვენი კამპანია მოუწოდებს საქართველოს მოქალაქეებს, არ დავუშვათ კრემლის მხრიდან მათი ხსოვნით ცინიკური მანიპულირების მცდელობა და გამარჯვების დღე ევროპასთან ერთად 8 მაისს აღვნიშნოთ.“

დასავლეთ ევროპა ნაციზმზე გამარჯვების დღეს 8 მაისს აღნიშნავს და მეორე მსოფლიო ომში დაღუპულთა ხსოვნას პატივს მიაგებს, რუსეთი ამ მოვლენას 9 მაისს „უკვდავი პოლკის“ მსვლელობით ხვდება. საერთო ისტორიულ მეხსიერებაზე აპელირებით კრემლი ცდილობს ეს დღე საკუთარი საგარეო გავლენის ბერკეტად გამოიყენოს და სწორედ ამიტომ შეარჩია სიმბოლოდ წმ. გიორგის ლენტი და მოახდინა „უკვდავი პოლკის“ თავდაპირველი იდეის პოლიტიზება, – აღნიშნულია მედიის განვითარების ფონდის გვერდზე.

„უკვდავი პოლკის“ მარშის იდეა, სადაც ადამიანები მეორე მსოფლიო ომში მონაწილე წინაპრების ფოტოებით გამოდიან, სამ რუს მეგობარს ეკუთვნის. პირველი მარში 2012 წელს გაიმართა და იდეამ სწრაფად მოიცვა მთელი რუსეთი, რის შემდეგაც 2014 წელს მარშს კრემლი დაეპატრონა, იდეის ავტორები განდევნა და უცხო ქვეყნის აგენტებად გამოაცხადა. შემთხვევითი არაა, რომ „უკვდავი პოლკის“ მარშის სიმბოლოდ წმინდა გიორგის ლენტი შეირჩა, რომელიც 2005 წლიდან საყოველთაოდ გამოიყენება რუსეთის სახელმწიფოს მიერ დაფინანსებულ გამარჯვების აღლუმებზე და ყოფილ საბჭოთა ქვეყნებში კრემლის ექსპანსიისა და ჩარევის სიმბოლოდ მიიჩნევა. მოგვიანებით წმ. გიორგის ლენტი გახდა სიმბოლო უკრაინაში რუსეთის შეჭრისა და „ნოვოროსიას“ ანუ „ახალი რუსეთის“ კონცეფციის.

ახალმა კორონავირუსმა ქუჩებში კრემლის ალტერნატიული ისტორიის დემონსტრირებას ხელი შეუშალა, თუმცა „უკვდავი პოლკის“ მარშმა წელს ონლაინ სივრცეში გადაინაცვლა.

წყარო